Mi son un omo che no ga grandi pretese de esser tuto lustro e fin co vado in giro; me basta de esser, come se disi, in ordine. Per mi esser cussì ga sempre voludo dir gaver un per de braghe stirade, 'na camisa neta e el sacheto che me casca a plomb. El tuto con i colori in armonia, che no xe bel gaver le calze blù, le scarpe maron, le braghe verdi e magari la giaca de color dela vinaza.
Per tuta la vita son andado avanti cussì; co go cominciado a esser un giovinoto, la sera co andavo fora me vardavo ben de meterme le braghe de terliss, con quele ghe lavoravo.
Me ricordo ancora però le barufe e i pianti, co iero putel nela famosa età difizile, perché mia mama me lassava meterme el vestito "bon" solo de domenega per andar in ciesa, opur se ierimo invitai de qualche parte, perché el doveva durarme fin che le manighe del sacheto no le me rivava squasi a metà del brazo (e man a man ghe iera i segni dele slongade de l'orlo). E cussì per le braghe, che la ameteva che le fussi diventade curte solo co tuti i ghe domandava se fasevo el pescador, visto che pareva che le portassi curte cussì per no bagnarghe la balzana. E come che la xe imbilava!
- Te magni tropo, per quel no te fa che cresser. Ma cossa, te ga tanta furia de
diventar un calandron?! - E mi a sconderme per la vergogna de no restar
nano.
- Metite le braghe de terliss - la me urlava co la vedeva che me vestivo per andar fora - no xe domenega!
E mi che speravo de veder la muleta che me piaseva, andando a passegiar in Corso o in Acquedoto mostrandome nela mia forma meio! Pianti su pianti, ma no serviva.
Ogi i mi fioi i inoridissi co ghe digo che i dovessi meterse el vestito bon,
visto che xe domenega o qualche altra festa comandada.
- Ma papà, no te se intendi propio, de elegansa, ti! Ghe vol i jeans, se no me fazo rider de tuti!
Me speto adiritura de veder che i fazi anca i pigiami, de jeans, perché me par che tuti e in tuti i zorni dela setimana, i se vesti precisi: jeans e felpa, i protagonisti del secolo passado e de questo pena scominziado, che se anca cambia un poco la confezion: scarsele de quà e de là, più su o più zo, scoloridi ancora prima de gaverli lavadi, che ghe pensa zà el fabricante a renderteli veci, el sugo resta quel.
Busi in posti dove che se vedi ben (fati con arte, sempre dal produtor) orli che manca e anche cintura che manca. Insoma, se ai mi tempi gavessi dovudo andar in giro cussì o rinunziar al liston, credo che no saria andado mai fora de casa.
E le felpe? Prima bastanza normali, pò no se ga visto più le man dei "infelpai", perché le manighe le iera longhe come se fussi una taglia 56, ma inveze iera la 44. Le mule, specie lore, le pareva tute dele derelite costrete a portar la roba vecia de una sorela 'ssai più granda, de ani e de statura, e la picia inveze la iera restada indrio cola cressita.
Purtropo, la mia pase xe finida quando mia moglie ga scominziado a tormentar:
- Te xe propio "demodé", sa. Me vergogno de vignir fora con ti.
- Cossa saria, mi?!
- Demodé, te saria, anzi te xe! Fora moda, no, ignorante! Sempre con quei tui vestiti completi, camisa, cravata...... Son stufa anche de sentirte dir "ogi me meto el spezato" come se fussi el colmo dela sportività e dela concession che se pol far ala comodità. Te devi comprarte i jeans, te devi. Ciol esempio dei tui fioi, e anche de mi che vivo ogi, no ai tempi de Marco Caco come che te fa ti!
Speravo de salvar almeno mi el bon nome dela fameia, ma se te vivi con zerti sotosvilupai mentali, te se devi o adeguar o continuar a far onde da matina fin che riva note. Cussì me son lassado strassinar in una "jeanseria", che saria tropo normal ciamar un esercizio "abigliamento".
Devo dir che con mia grande sorpresa le persone serie, come che se pensa che sia
quei dela mia età, le iera squasi più dei zovini. Girava tipi con
panzeta che i se provava camise trasparenti, penso nate e ideade er far veder el
peto svilupado e irsuto; el risultato iera pietoso, squasi tuti gaveva la
canotiera o adiritura la maieta de lana, soto. Per darve l'idea, iera come se
una vecia marantiga se metessi un vestito scolado con soto un maion a colo alto
perché la patissi el fredo ale cervicali.
Se pensemo che adiritura ghe iera un che ghe se intravedeva la panzereta, ve lasso imaginar l'efeto.
Mi per fortuna son piutosto normal, come aspeto, anche se la mia siora la disi che son trooopo grasso, trooopo basso, che go el bacino trooopo svilupado, e inveze el torace poooco svilupado, e via de tanti altri trooopo e poooco discorendo. Forsi la vol criticar mia mama per come che la me ga fato, no so, ma se la se vardassi ogni tanto ela........ bon, mi no critico. E gnanca me lamento de come la me ga fato i "mii" fioi.
Iero la che zercavo de veder dove iera quei mussati che viagiava soprendentemente de giorno inveze che de note, e solo in quel negossio. Da quando che me ricordo mi quele belve assetade de sangue cola verigola in zima le colpissi senza pietà quando xe scuro, no nele ore de lavor dei negozi. E del resto, a casa mia de giorno le iera sempre sconte.
Quel zzzz zzzz carateristico el iera continuo, e mi fasevo opera de prevenzion sc'iafizando l'aria ogni tanto. Me son incorto solo dopo un poco che iera el rumor dele seradure lampo che no faseva che serarse e verzerse in continuazion, man a man che la clientela se meteva e se cavava quele braghe de stofa blu e dura, che a mio parer 'ssai poco le gaveva dela eleganza pretesa dala mia egregia siora.
Man man che vedevo i altri aventori entrai e servidi prima de mi, cussì me passava la voia de meterme nei pani del cliente. Un poco come sucedi dal dentista, l'unico posto dove tuti no fa che dir, ma prego, la vadi pur, che mi go tanto de quel tempo......
"Pazienti" che più pazienti no se pol, adiritura disposti a tornar un altro giorno se da l'interno de l'ambulatorio se sentiva qualche urlo più straziante del soportabile. Pensar che in tuti i altri loghi dove bisogna meterse in fila, se ris'cia cortelade de dar e de ricever, se un furbo el te vol passar avanti o se te zerchi de far el furbo ti. Bon, mi cussì me sentivo. Ma la mia ben gentil siora la me tigniva de ocio, e là dovevo restar.
Perché, me domandaré, iera cussì terificante el tuto? A mio parer i pareva una camera de tortura, quei camerini de prova. El cliente vigniva fora stravolto quasi che el fussi stado costreto a far solevamento pesi; insoma, coi oci fora dela testa, el iera, e col sudor che el colava a biondedio.
Un omo che evidentemente el gaveva tirada indrio la panza fin al limite massimo, e lo stesso nol gaveva rivado a serar quela maledeta chiusura lampo, el ga messo el naso fora e el se ga visto agredir da una comessa che con forza erculea e senza riguardo, la gaveva ciapado in man el pirulic e - zip - con un colpo solo la seradura iera stada serada. No senza però gravi conseguenze per quel che iera drento dele braghe, che el mato pareva esser stado squartado, da tanto che el iera diventado palido, mentre con una man el se tocava disperatamente la parte lesa.
- Ma perché nol se ga provado un per de braghe più grandi de
misura - go pensado mi.
E no te sento che la moglie e la comessa le disi: - Tropo grandi, ghe sta tropo
larghi sule gambe - che invexe a mi le me pareva come se le fussi do caramele
ciuciade cola carta, scusé, cola stofa tacada intorno.
Quel povereto el zercava de protestar, ma el dolor lo gaveva lassado senza vose.
E la moglie:
- La ga ragion signorina, el caval xe tropo zò, no segna ben.
El povero omo el ritrova un poco de vose e el disi:
- Che caval? mi no me importa del caval se el xe tropo zo e se nol segna ben. No
son quà per veder una partida de balon zogada dai lipizani, sa? e
gnanche per farme torturar a pagamento!
- Tasi ti - ghe fa la moglie - che no te capissi gnente de moda. El caval xe el cavaloto, che devi passar a fil cico cico tra el davanti e el de drio, segnando anche un poco el mezo. A ti no te segna, e alora vol dir che xe tropo larghe, quele braghe!
Pò vedo un che vien fora da quei camerini dove scominziavo a creder che
ghe fussi una specie de Tribunal dela Santa Inquisizion contro quei che voleva
braghe normali, strassinandose drio venti centimetri de fondo braghe e
ris'ciando el tombolon a ogni passo. Povereto, el iera dela configurazion
curtilinea, con però un dedrio de taglia cinquantadue e le gambe de
taglia 48.
- No la stia bazilar perché i se longhi - ghe fa la comessa -
l'importante xe che i devi esser bastanza streti. E no me par che ghe
semo.
- Che xe longhi, ma proprio 'ssai longhi, ghe lo confermo anche mi. E no assai,
ma za tropo, streti! No xe con un per de più streti, che i diventa
normali de novo......- ghe rispondi cripticamente el mato.
Insoma, la scena no la iera dele più incoragianti, eco.
E le done, me diré voi? Ben, là iera un poco meio, de vardar, a mio parer. Da quel che go capido mi, pareva che i jeans i passassi positivamente l'esame e i vignissi comprai solo se el cavaloto da davanti a de drio el faseva da spartiacque tra panzeta, gambe, cavaloto e el de drio, apunto. Se el solco no el iera bastanza profondo, la misura iera tropo grande e le braghe vigniva scartade per passare ala misura più picia. No starò a dirve cossa vigniva spartido a un zerto punto, che gavé bastanza imaginazion.
Iero la che spetavo de veder chi vigniva squartado per primo, e gavevo un bel poco de preocupazion nel mio animo.
Ma quel che me ga spaventado davero, xe che da sentado come iero me vedevo 'sti
jeans che me passava davanti continuamente con drento do gambe a volte tropo
muscolose e a volte con do stecheti che squasi i faseva parer braga destra e
sinistra un bic meno incolada ala pele soto de la stofa El fato xe che no
riussivo a capir se el "ripien" stivado drento a forza el iera de mas'cio o de
femina. Dove che ghe xe la pata, no se vedeva diferenze, quel che se trovava a
l'interno o el iera mancante opur mastruzado; e mi saria stado un de quei
destinadi a far parte dei mastruzai. Quando pò go sentido un de sti
amanti forzai del jeans domandarghe a un altro se se lo portava a destra o a
sinistra, essendo che in mezo iera tropo doloroso con tute quele cusidure grosse
e ribatude, ricevendo per risposta solo un moto de oci disperado e rassegnado
come de un che el sta rinunciando a l'uso de l'articolo in question per
probabile rinsechimento del medesimo, me go deciso, me son alzado e ghe go dito
a mia moglie:
- Se te me vol come son abituado a vestirme, te me ciol. E se no divorziemo.
E via mi fora dela botega, che per colmo de ciolta in giro la gaveva l'insegna "Paradiso dei Jeans - tutto quanto vi piacerebbe trovare". No tuto, no. Un bel per de braghe larghe e comode, la drento, mi no lo go visto propio!
Barufe su barufe, ma no go cedudo. E go voludo vederghe ciaro, su sta moda. Go un amico che el xe dotor e che un giorno el me contava de ste modernità, quanto che le podeva far de mal, ala muleria, ale babe e ai siori mati che voleva andar, come se disi "a la page" (no son pò quel retrogrado che disi mia moglie, le parole nove le so anca mi).
- Varda la minigona - el me disi - la ga fato vignir una epidemia de malatie, specie de estate, quando le mule le se meti cotole curte che più curte no se pol, e po le se senta quà e là, nei bar, sule banchine, sule moto dei altri.... insoma, in posti dove se gà pozado anche altri deretani e parti intime. El risultato? Infezioni passade a tuto el grupo frequentante.
Per no dir dei omini; i vien quà a lamentarse de gaver mal de testa, e mi ghe digo: caval tropo streto, xe. Ma xe de moda cussì, i me rispondi. Bon, alora tignive el mal de testa e speteve anche altro, ghe rispondo, tipo una bela atrofia del muscolo più caro che gavé. Te credi che i preferissi de no gaver emicranie? Te sbagli, i va e i se compra qualcossa de più streto ancora, e pò i passa in farmacia far scorta de cibalgine. Se vien de novo de moda la cintura de castità e se la xe anca pei omini, te assicuro che la gaveria mercato: i me par tuti fanatici.
Pò ghe xe stado un periodo de tregua, mia moglie no parlava, mi no fiatavo e me vestivo come me pareva. Però ala fin me iero convinto a ciormelo, un per de 'ste braghe, ma dela misura che me andava ben a mi. Bela larga e comoda, anche se dovevo farghe scurtar circa trenta centimetri in fondo a ogni braga.
Me son godudo la sodisfazion de no doverme cambiar mai, cò dovevo andar in qualche parte; i jeans bei neti, e me racomando mai stiradi, i va ben per tute le ocasion . Andemo in ciesa? Jeans. Andemo a passegiar in corso? Jeans. Andemo adiritura a un matrimonio? Jeans, ma con giacheta de smoking e farfalin regolamentar. Gavemo ospiti de riguardo? Jeans. Insoma, no gavevo problemi, se gavevo indosso i jeans iero a posto dapertuto.
Si, proprio dapertuto me riussiva de aprezarli, fora de quando me spoiavo per andar in leto. Iera a quel punto che rimpianzevo le braghe de una volta, bele comode e con scarsele profonde e in una zerta maniera indipendenti dala braga, assetada o larga che la fussi; perché le scarsele fate cussì, cò te meti la braga sotosora, le resta sempre col fondo de soto, e no casca fora gnente. I jeans inveze i gà scarsele con l'entrata che la par quela dele musine dove che passa una flika per volta. Cussì le xe, cussì le resta, in qualunque modo te pozi le braghe co te te le cavi. E se te le pozi , meti, sula spaliera dela poltrona, come sempre te ga fato, le scarsele le segui el destin del dessù dela braga, che el diventa el de zò, per cui tuto quel che te gà in scarsela casca.
Xe 'ssai dizifile infilarghe qualcossa; e altretanto difizile xe cavar fora de là qualcossa, tanto che co te ghe provi par che te voli farte un auto-furto, e no servi anche se te xe un esperto del ramo, la scarsela no mola el suo contenuto.
Ma se te cavi i jeans e te li pozi come fazo mi, per dir, su quela specie de trapola che se ciama indossator, le scarsele va nela direzion dela braga perché no le pol far altro; alora te vedi come che vien fora fazile tuto quel che te ga messo in quele davanti e in quele de drio! Meti che te sia tornado tardi a casa; tuto xe andado ben, la baba no se ga sveiado fin che no te se cavi le braghe. A quel punto se sonassi una sirena l'efeto el saria preciso: tin tin, ton ton, sbeng sbeng, e spera anche de no gaver fato su tropa moneda, che quela sbatocia in tera ben e la sona ancora meio! Risultato? Luce tipo terzo grado nei oci con drio una furibonda moglie che te disi: A sta ora, te torni?!
Cò te va inveze in leto presto, te senti quando che se spoia i altri, tanto che anche se no te xe curioso ala fin te sa 'ssai de preciso quando va a dormir un o l'altro dei inquilini, perché ogni volta che qualchedun se cava i sempre presenti Jeans, ghe casca tuto e el te sveia. Per mi i Jeans i dovaria esser messi fora lege, perché de fato la privacy no la xe proteta, prima de tuto; e gnanche el tuo riposo xe proteto, perché i ritardatari i te sveia sempre sul più bel, quando finalmente te ieri riussido a ciapar sono. Insoma, ognidun xe ala mercé de quei che i abita vizin, sora o soto de lù.
Iero a sto punto quando la mia siora la me disi:
- Ti, bel omo. Xe vignudo fora i jeans che par fati su misura per quei che se lamenta che i xe streti.
Go lassado perder la precisazion che ormai gavevo risolto el problema comprando quatro taglie più grandi de quele che la comessa me consigliava; cò no se vol capir, no se capissi, xe el mio moto. Che saria come che disessi che no ghe xe un sordo pezo de quel che no vol sentir. La baba la faseva la sarcastica? Bon, saria andado a veder la nova moda, sperando magari in una modifica dele famose e scomode scarsele.
Inveze no! Cossa trovo in "Jeanseria - Tutto quanto vi piacerebbe trovare" ? Quel che no me gavessi mai spetado ne meno che mai desiderado de trovar.
Vado drento e domando ala comessa un per de braghe de quele del tipo novo e
largo. Ela la me consegna el capo e mi vado in camerin a provarlo.
Xe ben che vero che le braghe le iera larghe, tanto larghe, del tipo Paiazo de
circo, tanto che credevo che i me gavessi dado la misura sbagliada; quando
pò le gò indossade, me ritrovo con el punto de vita che me riva
fin soto scaio, mentre l'orlo el me coverzi pena pena i zenoci.
- La me ga ciapado per Bagonghi, la comessa? - penso, e con sto pensier vado
fora del camerin per dirghelo, ritrovandome de fronte a quel che vigniva fora
dal camerin vizin del mio, vestido anzi, come dir, imbragado fin soto i scai
anche lù. E la comessa, con aria de suficenza verso due poveri
mentecati, la se precipita verso de noi e, prima a un e dopo a l'altro la ghe
cala el cavaloto fin che la braga torna al giusto punto, in vita.
- Xe cussì che se indossa, me par che sia evidente, no?! - la ne fa con
aria de comiserazion.
Insoma, el famoso cavaloto, che prima el pareva voler taiar in do la persona a scominziar da l'incrocio dele gambe andando in su, da tanto che el stava tirado, 'desso el iera finido sui zenoci. Nei ani e nei jeans passai, pareva che un gavessi voludo entrar a tuti i costi nele braghe de su fradel de 'ssai ani e statura più picio; 'desso pareva che el picio se gavessi vendicado ciapandoghe le braghe del fradel 'ssai più vecio e più alto, o adiritura del papà, taiando via de soto el toco che vanzava.
Roba no difizile; el colmo dela eleganza iera de andar con l'orlo a sbrindolon , come se a un ghe fussi morta l'unica sarta che el conosseva.
Mi e quel altro se gavemo vardai, e se gavemo ricordado de esser persone serie. Dietro front in camerin, un saludo ala comessa e via de corsa tuti e due, strissando rente al muro perché nissun podessi sospetar che frequentavimo posti simili.
Per cui mi go deciso: i jeans xe comodi, ma li compro solo se trovo la misura che me va ben a mi, no ala comessa. E no voio sentir de moda. Son contento che desso tuti i pol farse creder altolocati, perché oramai come se vesti tuti xe diventado cussì uniforme e omogeneo che solo le zingane te le riconossi subito per quel che le xe, perché lore le viagia sempre con cotole e cotolone, nonché fazoleto tipo bandana ligado sula testa.
I altri, i pol esser nobili, o deputati, o operai o laureati o botegheri o mati de cadena; qualunque roba. Tuti precisi, i xe vestidi, in nome de l'anticonformismo. Ma sta parola, no voleva dir che te son controcorente? E alora, come se pol pensar de esser vestido controcorente se ghe xe una fiumana de zente che va in giro vestida come ti?
Cò me vien voia de far el contestator, me meto el mio completo: braghe e giaca, magari un bel gessato; camisa e cravata in tinta, e scarpe che va d'acordo con tuto el resto.
Gnente casual, con la camisa più longa dela giaca a vento, o con la maieta più curta che no coversi el bugnigolo, o con el maion soto dela camisa, o con i jeans col cavaloto a l'alteza dei zenoci e el maion ligado in vita. Quela roba xe da alineadi in massa.
No me conformo, mi. Vesto solitario e "strambo", anche se cussì i me ciapa per contestator dei contestatori! Come dir reazionario, insoma.
Inveze me piasi el progresso, a mi; anche se go l'impression che per andar avanti se devi tornar indrio. Perché mi, ale braghe de paiazo no cedo. Per no parlar del fato che me inciampo, col cavaloto che me riva ai zenoci.
Ma che vadi in malorsiga anche i stilisti! Xe tanto dificile far le braghe adatade a l'omo, inveze de pretender che sia l'omo a adatarse ale braghe?