... anca a chi no fuma. Prima de passar a contarve sta roba spaventosa, devo far
una necessaria premessa.
No ocori che ve spiego cossa saria un Nick Name, no? Essendo tuti viagiadori
cibernetici, saverà ben che ognidun, cò nol vol farse riconosser,
el scegli de ciacolar coi altri usando un soranome.
Semo in era global, e el parlar el xe global, cussì 'desso sto soranome
(che una volta magari el serviva a etichetar qualchedun per un certo suo modo de
far o de esser, o per un vizio incontrolabile de cui el iera preda) 'desso el
servi per babar senza pagar dazio, come se usa dir, e magari per farse
riconosser da qualchedun sensa farse riconosser da chi no ne comoda. Se, per
dir, un se firma Sergio, un pol scominziar a pensar: questo lo conosso, e
pò el fa le robe come quel Sergio che.... ; ma se el se firma ostrogoto,
no credo che el possi dir chissà se xe l'ostrogoto che conosso mi. In
quanto a far confusion, tuti in genere i sta atenti a ciorse un Nick Name
original e per educazion quel che vien dopo, el se buterà su de un'altra
sponda.
Quà se trata de amici che gà sielto, nel loro picio mondo de
frequentatori de un sito, de ciamarse coi nomi de diverse bestie, o de tignir
quel che ghe ga dado mama, se cussì ghe comodava.
Mi che son Jole, ma proprio Jole anche nela vita real, son una che ga la passion
dela navigada e dela babada cibernetica; mio marì inveze no, e
cussì mi so quel che lu nol sa. Xe per questo che nol riva a capirme,
cò ghe parlo de altra zente. Per lù, se trata de altre bestie,
oltre che mi. Lassemo passar el vocabolo, ma in privato me informerò se
xe questo che el intendeva de dir.........!
El tuto nassi dal fato:
- che la pantera la ga el marì che fuma tropo; e che la ga domandado
aiuto ai altri.
- che tra tuti xe vignudo fora barufa, a suo tempo, per via de un mussulman che
la cangureta vivente in Australia no soportava come vizin de leto in ospedal,
e lù nol ghe badava e el pregava istesso zinque volte al giorno, e
cussì ela la faseva la comunion ogni matina. Da questo ala guera de
religion el passo xe stado breve perché ghe iera:
- chi no soportava i mussulmani;
- chi inveze se gaveria magnadi crudi e vivi tuti i apartenenti a altre
religioni, nela specie quele ispirade al Dio dela Bibia, de nome diverso de
Allah (che sia colpa de sti quà, se ghe xe stadi i atentati e che
adesso i bombarda l'Afghanistan?!), esclusi i Indù, che ghe stava
simpatici;
- ghe iera anche quei (come la Sweety, persona che ama andar a caval e che la
ritien che un ingegner sia el prototipo de l'omo perfeto, rivando a proclamar
che chi no xe amado da un ingegner no sa cossa che xe la vita) - che i xe
gavessi, ala fin, magnà tuti sensa distinsion per la bile de dover star
a lezer pagine su pagine su sti discorsi.
Questi ultimi i xe diseva in assoluto no razisti verso nissun, e pacifisti al
massimo; tanto che i propugnava el silenzio forzato de chi pacifista no iera;
anzi, a chi se permeteva ancora de nominar raze e razismo, domandava che ghe
vignissi taiada la testa o almeno la lingua e cioè el mouse. Dove anderemo
a finir se xe quei che no soporta le barufe i comincia a eliminar fisicamente
tuti i altri che sbarufa? Bon, andemo vanti, va, che el sol magna le ore.
Eco la storia. Jole (mi ) ghe scrivi a l'amica che ga el marì che fuma:
Cara Pantera,
Stanote no podevo dormir, e cussì go impizà la luce e vardavo mio
marì. El se ga sveiado.
- Cossa, no te dormi? E perché te me vardi cussì?!
E mi : - Voio capir cossa che go perso....
- Perso? perché, perso?
E mi: - Ti no te xe ingegner!
- E alora? devo domandarte scusa?!
E mi: - No ocori. Gnanche mi son una ingegnera.
- Ma che raza de.......
E mi pronta: - Shhhhhhhhhhhhh! Sweety no vol che se disi quela parola! La xe che
persona no vol ciapar posta de l'Australia perché la disi che i mussulmani
ghe vien zà fora pei oci.
- E chi saria sta persona( penso che la sia inglese, no?) si, digo sta Sweety
che me vol comandar?
E mi: - Finlandese, no inglese.
- L'ingegner, l'inglese che xe finlandese, i mussulmani, la cangureta......Jole,
te se ga de novo zogado tropo col computer, ah? E 'desso te ga el scioc. No
gaver paura, picia, qualunque problema te gabi, son quà mi!
E mi: - No son mi che go problemi. Xe la Pantera
- La pantera? Cossa, 'desso te se coneti e te ciacoli anche con la giungla?
E mi : - Ma che giungla e giungla, la Pantera sta in furlania!
- In furlania? E no la se adata a l'ambiente? opur no ghe xe alberi bastanza
robusti dove che la se possi rampigar?
E mi: - No xe quel el problema. El problema xe el Sicilian. El Fuma!!
- E a ela cossa ghe interessa? La sta in furlania, no?!
E mi: - Anche el Sicilian. Xe su marì. Lù el fuma e alora ela no
resta incinta. El Sicilian no xe bravo come Stelio
- Ma cossa, el sicilian no sa fumar e far anche quela altra roba? E come fa la
giaguara a saver che inveze Stelio el xe bravo a farla? - e quà el se
intaia e el me varda coi oci de fogo - E chi saria, pò, 'sto Stelio. Te
lo conossi, ti?
E mi: - El xe el Cangureto, ma no parente dela Cangureta de prima. Da quando el
ga savudo de l'arivo del Romano, nol fuma più.
- Bela forza, come se no fumar, per un canguro, fussi la fin del mondo! E 'sto
altro, sì, quel roman de l'ostrega, cossa el xe, un oculto seguace
dela setta del teror che colpissi i canguri che fuma? Ara che lo denuncio ala
protezion animali, sa! No per gnente, ma in fin dei conti el xe un nato dove
che semo nati noi, semo tuti fioi dela stessa tera e no me comoda che el ne
fazi sta publicità negativa, a mi!
E mi: - Setta, setta..... Me ricorda qualcossa. Xe meio no dir gnanche quela
parola, sa? El Romano, comunque, nol xe roman, e gnanche un che perseguita i
cangureti. El xe el Cangurin.
- El roman no xe roman? Alora el triestin no xe triestin? El padan no xe padan?
Bisogna che te tegno de ocio, te ieri sempre cussì inteligente.......
No te fa ben, chattar tanto con l'Australia, i cangureti e i cangurini,
sa......
E mi: - Cossa c'entra l'Australia con el Cangureto e el Cangurin, 'desso! El
Romano xe el cucioleto che ghe nasserà a Stelio el Cangureto tra un poco,
no?! E pensa, gnanca nato e el ga zà l'alpenstock. Ghe lo ga fato
l'Orso.
- A parte el fato che no capisso cossa che el cangurin possi farse de
l'alpenstock, no savevo che in Australia ghe iera orsi artigiani del legno. So
che ghe xe koala, mi, ma no orsi.
E mi: - Si, ghe xe Koala. Ma alora anche ti te parli con lù!
- Mi? Basta una in fameia che se missia col regno animal. No, che no conosso
koala, mi!
E mi : - Pecà, el xe un bravissimo architeto, Koala. Te podessi imparar
qualcossa da lù.
- Sì, a far le dighe pei castori, podessi imparar. Lassime fora, va. Xe
de lù che te parlavi, disendome de l'orso che fa i alpenstock in
Australia?
E mi: - L'Orso che te go dito el xe canadese, no australian. Pensa, el xe stado
tanto gentil da lassar de parte per un poco la stesura del libro che el sta
scrivendo col computer, proprio per farghe 'sto presentin al Cangurin!
- L'orso che el bati sula tastiera co le zate che el se ritrova? No credo!
E mi: - Va ben che go questionado con lù, ma no me son mai permessa de
dir che el ga le zate, sa?!
- E con cossa te credi che el ciapa i salmoni, là in Canada? El se meti
in mezo del torente, el slonga la zata, el tira fora le ongie, el grampa la
preda e la buta a riva, no?
E mi: - Ma te par che l'Orso el se meti a far cussì! E pò 'desso,
oltre ale zate, anche le ongie retratili el gaveria?! Se no te sa, in Canada i
ga anca lori le cane de pesca. Cò ghe ciapa la voia, l'Orso meti in acqua
la barca, el và al largo, l'arma el amo, el buta la lenza, el regola
el mulinel e el speta che el pesse abochi.
- Cossa cossa, mi de orsi che pesca co la cana no gò mai sentido, mi! Te
me conti flocie come de tuo solito!
E mi: - Se vedi che no te se aculturi col computer come che fazo mi...
- Vara, Jole, te me ga fato vignir un mal de testa.....
E mi: - Ernesto disi che in sti casi se devi cior una aspirina gigante.
- Un altro. E chi saria 'sto genio, un dotor?
E mi: - No, el xe un'Aquila. Per dirla tuta, anche ingegner, el xe. El ga
quarantasete ani; me lo imagino alto, aitante e - quà go dito la mia
cativeria - senza panza!
- Dighe a sta aquila genio-ingegner che se la beco a far el afascinante.... Ma
cossa te me fa dir!
E mi: - Tanto no te lo pol becar.
- Perché no svolo? So sparar ben, mi, sa.
E mi: - Sì che lo so, ma no credo che te sapi mirar de quà fin in
California. Xe là che l'abita. A meno che no te spari razi
intercontinentai.....
- Vara che i zerca volontari, i Taleban!
E mi: - Basta che te se assicuri.....
- Lassemo andar, va. Piutosto, quando nassi sto cangurin, in Australia.
E mi: - Cossa te fa pensar che el nasserà in Australia? Me pareria
strano, visto che su mama no intendi propio moverse de Trieste, e de solito el
fio nassi vizin dela mama, che mi sapio. Ma te me distogli dal vero problema,
ti, che xe quel dela Pantera. Ela no vol che el papà che dia el sangue
con drento la nicotina, al fio.
- Ma cossa, i gà un fio vampiro?
E mi: - Ma tu mama no te ga insegnado proprio gnente! Prima de diventar un
neonato, el fioluz xe un embrione, no? e drento el ga el sangue de mama e de
papà. Fifty fifty, come se disi. Prima de nasser semo tuti democratici,
xe dopo che se rovinemo.
- Varda che no sempre la nicotina del marì passa nel sangue del feto che
la mama porta in grembo.....
E mi: -Lo so, ma la Pantera xe femina seria e fedele. Marì e papà
sarà la stessa roba. Per cui....
- Ma sto sicilian, nol pol zercar de smeter? Nol ga paura del tumor?
E mi: - El disi che el fuma per cura, cussì i polmoni no ghe s'ciopa per
tropa salute. Pensa che el ga una capacità polmonare del 112%, no te digo
altro!
- El gaveria più capacità che polmoni? No credo!
E mi: - Stanote te xe de un incredulo che no se pol creder, sa? Se te digo che
xe cussì, xe cussì!
- E mi dovessi creder a quel che te me conti e magari andar a ripeterlo in giro
come el papagal.
E mi: - Anca lù te lo conossi? Ma alora te navighi cò mi
dormo!
- E te pareva se no ghe iera anche un papagal, de mezo! E cossa el disi, anzi,
cossa el ripeti col se meti a parlar, quela testa piumada?
E mi: - Ben, no lo go mai visto, el Papagal, no so se el xe calvo o no,
però el xe un bic monotono, a dir el vero. Ghe piasi dir sempre le stesse
parole, e le infila in ogni suo discorso. El devi gaver 'na passion per quele
che finissi in ista: razista, fascista, nazista, perbenista, fora dela lista.
Ognidun gà le sue fisime, no te credi? Basta no badarghe, in fin dei
conti anche lù el ga dirito de dir la sua, no? Xe solo che anche i altri
volessi dir la propia, eco.
- Te vol dir che qualchedun ga el coraio de no esser d'acordo con ti? Me
congratulo!
E mi: - Sempre a ofender, te xe. Con ti no parlo più. Xe meio che me
dedico al problema dela Pantera!
- Eco, brava. E pensa in scuro, che se pensa meio. Studa la luce che voio
dormir. Tanto mi no fumo.
E mi: - No te fumi come el Sicilian, no, ma purtropo no te fa gnanche altre
robe! Bonanote.
El sono no me ga portado consiglio, Pantera mia, ma me ga portado incubi.
- Ghe iera una fumigante ciminiera che parlava in sicilian: - agghiu 112 % de
ossigenu in corpu. U fumu no fa male, a mia.
- Pò ghe iera un Vampireto che portava in giro un cartel con su scrito:
Volemo sangue e no nicotina!
- El iera seguido da una Pantera con un altro cartel: se lù el fa
Smokie, mi no fazo Nokkie!
- Pò ghe iera el Cocodril che comosso e con le lagrime nei oci el
declamava: L'Orso xe l'essere superior, e el Papagal el suo Profeta.
- Tuto questo mentre una Sweety finlandese che gaveva nome inglese la galoppava
in giro menando fendenti con un spadon e disendo: Guai a voi, specie se xe
autraliani o trevisani!
- Da l'Australia vigniva el flebile lamento de un Cangurin neonato che tremava
de fredo e el implorava: mama, perché son nato quà se ti te xe
là a Trieste? Me manca tanto el tuo caldo marsupiooooo...
- El Cangureto, per altro, el iera tuto fiero del suo cuciolo che nol gaveva
nicotina drento. Mi no go fumado, mi no fumo, mi no fumerò: el
continuava a coniugar 'sto verbo al passato presente e futuro. Pensa che iera
l'unica persona che me pareva bastanza normal!
- L'aquila ingegner el se butava in pichiata su tuti quei che ghe rivava a tiro
e el ghe dava certe gnocade in testa con una aspirina gigante, disendo:
vedemo, se no ve vien mal de testa, mi son per darghe impulso al mercato dele
aspirine, mi. Mi son per el capitalismo, mi!
- Un marochin el vardava el tuto 'ssai sodisfato, e el diseva soghignando:
Gnanca con la Guera Santa, saressimo stai boni de far nasser un casin
cussì!
- Ala sua destra el marì de la Rosy de San Antonio - Texas - sentado in
bar coi amici de Trieste el diseva: brava Jole, l'argomento el xe bon.
Continua. E zo ridade a più no posso.
- Ala sua sinistra ghe iera Elena in abiti sucinti che ghe mormorava al
marochin: mi no go gnente contro ti e la tua zente, e gnanca contro i
messicani, i Incas, i arabi in zenere, i pakistani, i afghani...no son
razista, insoma! No la ga fato gnanca in tempo a finir (la voleva domandarghe
al mussulman se el voleva far una cavalcada con ela), che xe rivà
Sweety urlando mentre la ghe taiava la testa: Chi parle de raze e de razismo,
no merita de viver!
- A sto punto se gà fato avanti el Papagal, che per una volta tanto el ga
fato rima con ismo: ma no parlando. El voleva parlar, ma el xe sta ciapado da
un ataco de mutismo. No te digo che pena (sua, no mia).
Mi vedendo tute 'ste robe e con la testa de Elena che me se intorcolava in mezo
dele gambe mentre la continuava a dir mi no son razista, gò sbarado tanto
de oci terorizai, te capirà. E go alzado el sguardo implorante al ziel,
in una muta invocazion, sperando che no me vedessi Sweety. E in quel bel azuro
limpido xe aparsa una scrita cubital: Attendere, arresto dell'incubo in corso.
Iero là jazada de paura dala ponta dei cavei fin a quela dei pie, quando
finalmente xe aparsa un'altra scrita: Ora potete spegnere l'incubo.
Mio marì se ga sveiado perché, dormindo, cole man zercavo
disperatamente qualcossa soto de i linzioi; se vedi che me ga parso de gaverlo
trovado, e go strucado forte quel che per mi iera un interutor volante dela
luce; e a lui no ghe ga piasso per gnente, quel strucon.
- Che intenzion te ga - el me ga sbraitado - de farme diventar 'na vose
bianca?!
Bon, ghe go perdonado, se no altro perché el me gaveva cavado fora de un
incubo spaventoso, sveiandome.
Cara amica, te prometo de pensarghe, al tuo problema, ma tra un poco,
perché 'desso go 'ssai problemi mii quando vado in leto. Andarà a
finir che forsi el Sicilian finirà de fumar, ma mi scominzierò de
novo: patisso de una insonia che me fa star sul chi vivi fin che riva matina. E
son 'ssai nervosa.
Con afeto,
la tua amica Jole